جناح اسپتال کراچی میں پہلی بار کینسر کے مریض کو مصنوعی گھٹنا لگانے کا آپریشن کامیاب رہا۔
تفصیلات کے مطابق کراچی کے جناح اسپتال میں گھٹنے کے کینسر کا کامیاب آپریشن کیا گیا ہے، 35 لاکھ کی لاگت کا آپریشن بالکل مفت کیا گیا اور پہلی بار کینسر کے مریض کو مصنوعی گھٹنا لگایا گیا۔
26 سالہ نوجوان کو مصنوعی گھٹنا لگا کر نئی زندگی دی گئی ہے، ڈاکٹر فرخ کا کہنا ہے کہ جناح اسپتال کی تاریخ میں یہ پہلا مصنوعی گھٹنے کا کینسر آپریشن کیا گیا ہے۔
4 گھنٹے طویل آپریشن میں ڈاکٹر فرخ، ڈاکٹر مظفر، ڈاکٹر ولی، ڈاکٹر شاہد اور ڈاکٹر خوش حال نے حصہ لیا، پلاسٹک سرجری ٹیم میں ڈاکٹر آغا وسیم، ڈاکٹر مہک، ڈاکٹر کومل اور ڈاکٹر فاروق شامل تھے۔
ڈاکٹر فرخ نے بتایا کہ نوجوان کو گھٹنے اور پاؤں کے نیچے کینسر تھا، آپریشن کے بعد مریض کے تمام ٹیسٹ نارمل آئے ہیں، مریض کے جسم میں اب کینسر کا کوئی اثر نہیں رہا ہے۔
ڈاکٹر فرخ کے مطابق مصنوعی گھٹنے کی قیمت 10 سے 11 لاکھ ہے، جو جناح اسپتال نے مریض کو مفت فراہم کیا۔ انھوں نے کہا کہ دنیا بھر میں استعمال ہونے والا یہ مصنوعی گھٹنا 20 سے 25 سال تک کارآمد رہتا ہے۔
