اسلام آباد (نیوز رپورٹ) – برطانیہ کے محکمہ ٹرانسپورٹ (Department for Transport – DfT) کی ایک اعلیٰ سطحی ٹیم نے اسلام آباد انٹرنیشنل ایئرپورٹ کا اہم سیکیورٹی آڈٹ مکمل کرلیا ہے۔ اس دورے کا مقصد پاکستان سے براہِ راست برطانیہ جانے والی پروازوں کی سیکیورٹی جانچنا اور ممکنہ بحالی کی راہ ہموار کرنا ہے۔
دورے کے دوران برطانوی ٹیم نے ایئرپورٹ پر مسافروں کی سیکیورٹی اسکریننگ، چیک اِن، بورڈنگ، امیگریشن اور ویزا چیکنگ کے نظام کا تفصیلی جائزہ لیا۔ ٹیم نے برطانیہ جانے والی پروازوں کی انسپیکشن بھی کی تاکہ فلائٹ سیفٹی کے تمام پہلوؤں کو مدِنظر رکھا جا سکے۔
پاکستان سول ایوی ایشن اتھارٹی (CAA) کے افسران نے ڈی ایف ٹی ٹیم کو بریفنگ دی اور سیکیورٹی کے انتظامات سے آگاہ کیا۔ یہ آڈٹ 10 جولائی تک مکمل کیا جائے گا، جس کے بعد ٹیم برطانیہ واپس روانہ ہوگی۔
یہ پیش رفت اس وقت سامنے آئی ہے جب برطانوی ایئر سیفٹی کمیٹی کا اجلاس رواں ماہ متوقع ہے۔ اس اجلاس میں پاکستانی ایئرپورٹس اور ایئرلائنز کے حوالے سے ڈی ایف ٹی ٹیم کی رپورٹ پیش کی جائے گی۔ حکام کو اُمید ہے کہ رپورٹ کے مثبت نتائج کی صورت میں پاکستانی ایئرلائنز، جن پر جولائی 2020 سے پابندی عائد ہے، دوبارہ برطانیہ کے لیے پروازوں کا آغاز کر سکیں گی۔
واضح رہے کہ یہ پابندی اس وقت لگائی گئی تھی جب پائلٹس کی جعلی لائسنسوں کا اسکینڈل سامنے آیا تھا۔ اگر موجودہ سیکیورٹی آڈٹ کامیاب قرار پایا تو یہ پاکستان کی ایوی ایشن انڈسٹری کے لیے ایک بڑا بریک تھرو ثابت ہو سکتا ہے۔
