کوالالمپور – نائب وزیر اعظم و وزیر خارجہ سینیٹر محمد اسحاق ڈار نے کوالالمپور میں منعقدہ 32 ویں آسیان ریجنل فورم (ARF) وزارتی اجلاس کے دوران کینیڈا کی وزیر خارجہ انیتا آنند سے ملاقات کی۔
دفتر خارجہ کے مطابق ملاقات میں دونوں رہنماؤں نے پاکستان اور کینیڈا کے درمیان بڑھتے ہوئے مثبت دوطرفہ تعلقات پر اطمینان کا اظہار کیا۔ فریقین نے تجارت، سرمایہ کاری اور اقتصادی تعاون کے شعبوں میں باہمی روابط کو وسعت دینے پر تبادلہ خیال کیا۔
اس موقع پر وزیر خارجہ اسحاق ڈار نے کینیڈین ہم منصب کو پاکستان کے دورے کی دعوت دی، جو انیتا آنند نے خوش دلی سے قبول کرلی۔ ملاقات میں خطے کی صورتحال اور باہمی دلچسپی کے دیگر امور پر بھی گفتگو کی گئی۔
