Higher Education Commission (ایچ ای سی) نے ملک بھر کی جامعات میں وزٹنگ فیکلٹی کی بھرتی، تدریسی ذمہ داریوں اور ادائیگیوں کے نظام کو بہتر بنانے کے لیے نئی ہدایات جاری کر دی ہیں۔ ان قواعد کا مقصد تدریسی معیار میں بہتری، بھرتیوں میں شفافیت اور جامعات کے عارضی اساتذہ پر بڑھتے ہوئے انحصار کو کم کرنا ہے۔
نئی پالیسی کے تحت جامعات کو ہدایت دی گئی ہے کہ وزٹنگ فیکلٹی صرف حقیقی تعلیمی ضرورت کی صورت میں ہی مقرر کی جائے۔ مستقل نوعیت کے تدریسی فرائض کے لیے ریگولر فیکلٹی کی تقرری کو ترجیح دی جائے گی، جبکہ وزٹنگ اساتذہ کو خصوصی مضامین، مختصر مدتی ضروریات یا محدود کورسز کے لیے رکھا جا سکے گا۔
ایچ ای سی نے یہ بھی لازمی قرار دیا ہے کہ وزٹنگ فیکلٹی کی تمام آسامیوں کا باقاعدہ اشتہار دیا جائے، واضح اہلیت کے معیار مقرر کیے جائیں اور امیدواروں کا انتخاب مسابقتی عمل کے ذریعے کیا جائے۔ امیدواروں کی تعلیمی قابلیت، تدریسی تجربہ، تحقیقی پروفائل اور پیشہ ورانہ مہارت کو جانچا جائے گا۔
پالیسی میں اقربا پروری، جانبداری اور مفادات کے ٹکراؤ کی حوصلہ شکنی کی گئی ہے۔ جامعات کو ہدایت دی گئی ہے کہ تمام تقرریاں اپنے منظور شدہ قوانین اور ضوابط کے مطابق میرٹ پر کی جائیں۔
ایچ ای سی نے وزٹنگ فیکلٹی کے تدریسی بوجھ کی حد بھی مقرر کی ہے تاکہ اساتذہ پر غیر ضروری دباؤ نہ پڑے اور تدریس کا معیار متاثر نہ ہو۔ اس کے علاوہ جامعات کو لیکچرز، حاضری، کورس آؤٹ لائنز اور طلبہ کی کارکردگی کا مکمل ریکارڈ رکھنے کی ہدایت دی گئی ہے۔
نئے قواعد میں وزٹنگ اساتذہ کو بروقت اور شفاف ادائیگیوں پر بھی زور دیا گیا ہے۔ ایچ ای سی کے مطابق بعض جامعات میں ادائیگیوں میں تاخیر کی شکایات موصول ہوئی تھیں، جن کے تدارک کے لیے انتظامیہ کو مالیاتی نظم و نسق بہتر بنانے کی ہدایت دی گئی ہے۔
تعلیمی ماہرین کا کہنا ہے کہ اگر ان ہدایات پر مؤثر عملدرآمد کیا گیا تو جامعات میں تدریسی معیار، شفافیت اور احتساب کے نظام کو مزید مضبوط بنانے میں مدد ملے گی۔
