اسلام آباد – اینٹی نارکوٹکس فورس (اے این ایف) نے ملک بھر میں انسداد اسمگلنگ آپریشنز کے دوران 84 لاکھ روپے سے زائد مالیت کی منشیات برآمد کرلی۔
ترجمان اے این ایف کے مطابق ملک کے مختلف شہروں اور تعلیمی اداروں کے اطراف منشیات فروشوں کے خلاف کارروائیاں تیز کردی گئی ہیں۔ چھ مختلف آپریشنز کے دوران چار ملزمان کو گرفتار کیا گیا جبکہ مجموعی طور پر 83 کلوگرام منشیات برآمد ہوئیں۔
اسلام آباد میں موٹر وے ٹول پلازہ کے قریب کارروائی کے دوران ایک گاڑی سے 300 گرام آئس برآمد ہوئی۔ گرفتار ملزم نے انکشاف کیا کہ وہ تعلیمی اداروں کے طلبہ کو منشیات فروخت کرتا تھا۔
ملتان میں ایک کوریئر آفس سے اسکاٹ لینڈ سے آنے والے پارسل کی تلاشی کے دوران کریم کے ڈبوں میں چھپائی گئی 120 گرام کوکین برآمد ہوئی۔
پشین میں ایک ہوٹل کے قریب گاڑی سے 65 کلوگرام چرس ملی، جبکہ ملزم کو موقع پر گرفتار کیا گیا۔ اٹک کے قطبال ٹول پلازہ کے قریب ایک گاڑی سے 9.6 کلوگرام چرس، رنگ روڈ پشاور پر موٹر سائیکل سوار سے 6 کلوگرام افیون، اور راولپنڈی کے کوریئر آفس سے پشاور سے آنے والے پارسل میں 2.3 کلوگرام افیون برآمد کی گئی۔
ترجمان کے مطابق تمام مقدمات انسداد منشیات ایکٹ 1997 کے تحت درج کرلیے گئے ہیں اور ملزمان سے مزید تفتیش جاری ہے۔
