کراچی – شہر کے مختلف علاقوں میں پیر کے روز ہونے والے مبینہ پولیس مقابلوں کے دوران ایک ڈکیت ہلاک جبکہ تین کو زخمی حالت میں گرفتار کرلیا گیا۔ ایک ملزم فرار ہونے میں کامیاب ہوگیا۔
تفصیلات کے مطابق بلوچ کالونی تھانے کی حدود میں شہید ملت روڈ کشمیر پلازہ کے قریب پولیس اور ڈاکوؤں کے درمیان فائرنگ کے تبادلے میں ایک مبینہ ڈکیت ہلاک اور دو زخمی حالت میں گرفتار ہوئے۔ ہلاک اور زخمی ملزمان کو چھیپا ایمبولینس کے ذریعے جناح اسپتال منتقل کیا گیا۔
پولیس کے مطابق ہلاک ملزم کی شناخت سکندر ولد عمر اور زخمی ملزمان کی شناخت عرفان ولد شاہنواز علی اور راشد علی ولد محمد علی کے ناموں سے ہوئی۔ پولیس نے ان کے قبضے سے غیر قانونی اسلحہ، نقدی اور زیر استعمال موٹر سائیکل برآمد کرلی۔
ترجمان پولیس کے مطابق گشت پر موجود اہلکاروں نے مشکوک موٹر سائیکل سواروں کو رکنے کا اشارہ کیا تو ملزمان نے فائرنگ کردی، جس پر پولیس نے بھی جوابی کارروائی کی۔ سی سی ٹی وی فوٹیج میں دیکھا گیا کہ پولیس ناکے پر تعینات اہلکاروں نے ملزمان کو روکنے کی کوشش کی تاہم انہوں نے فائرنگ کرتے ہوئے فرار ہونے کی کوشش کی۔
دوسری جانب، ابراہیم حیدری میں پولیس اور اسٹریٹ کرمنلز کے درمیان فائرنگ کے تبادلے میں ایک ملزم زخمی حالت میں گرفتار کرلیا گیا جبکہ اس کا ساتھی موقع سے فرار ہوگیا۔ گرفتار ملزم کی شناخت اسامہ عرف شیرو کے نام سے کی گئی۔
پولیس کے مطابق ملزم کے قبضے سے پستول بمعہ ایمونیشن، موبائل فون اور نقدی برآمد ہوئی۔ قانونی کارروائی جاری ہے جبکہ فرار ملزم کی گرفتاری کے لیے چھاپے مارے جا رہے ہیں۔
