کراچی – اینٹی وہیکل لفٹنگ سیل (اے وی ایل سی) پولیس نے قصبہ کالونی میں پراچہ قبرستان کے قریب پیر اور منگل کی درمیانی شب مبینہ پولیس مقابلے کے دوران ایک کار لفٹر کو زخمی حالت میں گرفتار کرلیا۔
پولیس کے مطابق، گرفتار ملزم کی شناخت 24 سالہ محسن علی ولد غلام شبیر کے نام سے ہوئی، جو مقابلے میں زخمی ہوا۔ اسے چھیپا ایمبولینس کے ذریعے عباسی شہید اسپتال منتقل کیا گیا۔
ترجمان کراچی پولیس کا کہنا ہے کہ ملزم امجد لاشاری گینگ کا سرگرم رکن ہے، جو کراچی میں 10 سے 12 گاڑیاں چوری کرچکا ہے۔ چوری شدہ گاڑیاں بلوچستان کے علاقے مشک میں فروخت کی جاتی تھیں۔
پولیس نے کارروائی کے دوران ایک چوری شدہ گاڑی، اسلحہ بمعہ گولیاں، موبائل فون اور نقد رقم برآمد کرلی۔
گرفتار ملزم کے خلاف اسلحہ کی برآمدگی اور پولیس مقابلے کے مقدمات تھانہ پیرآباد میں درج کیے جا رہے ہیں، جبکہ ساتھی ملزمان کی گرفتاری اور مزید گاڑیوں کی برآمدگی کے لیے چھاپے مارے جا رہے ہیں۔
