کراچی – ایف آئی اے کمپوزٹ سرکل گوادر کی جانب سے چھاپہ مار کارروائیوں کے دوران غیر قانونی سرحدی نقل و حرکت میں ملوث 14 افراد کو گرفتار کرلیا گیا، جن میں ایک ایرانی شہری بھی شامل ہے۔
ایف آئی اے حکام کے مطابق، گرفتار 9 افراد نے سمندری راستے سے ایران جانے کی کوشش کی تھی، جہاں سے وہ دیگر ممالک میں غیر قانونی طور پر داخل ہونا چاہتے تھے۔ گرفتار افراد کا تعلق گوجرانوالہ (3)، منڈی بہاءالدین (3)، سانگھڑ (4) اور شیخوپورہ (3) سے ہے۔
یہ گرفتاریاں جیوانی کے ساحلی علاقے سے عمل میں آئیں۔ مزید برآں، 5 افراد کو غیر قانونی طور پر پاکستان میں داخل ہونے پر گرفتار کیا گیا، جن میں ایک ایرانی شہری بھی شامل ہے۔
ملزمان نے پی بی 250 گبد لینڈ روٹ کے ذریعے پاکستان میں داخل ہونے کی کوشش کی۔ تمام افراد کے خلاف مقدمات درج کر کے تفتیش کا آغاز کر دیا گیا ہے تاکہ انسانی اسمگلنگ کے اس نیٹ ورک کی مکمل تفصیلات سامنے لائی جا سکیں
