لاہور – قلعہ گجر سنگھ پولیس نے تین سالہ بچے ناسق حسین کو چوہنگ سے بازیاب کرالیا، جو گزشتہ روز حاجی کیمپ سے اغوا کیا گیا تھا۔
پولیس کے مطابق، بچہ اپنے اہلِ خانہ کے ساتھ شاپنگ کے لیے آیا تھا جب ملزم نے اسے اغوا کرلیا۔ واقعے کی اطلاع پر بچے کے والد نے مقدمہ درج کرایا۔
ڈی آئی جی انویسٹی گیشن سید ذیشان رضا نے معاملے کا نوٹس لیتے ہوئے ایس پی انویسٹی گیشن سول لائن خالد سعید کو بچے کی بازیابی کا ٹاسک دیا۔ انچارج انویسٹی گیشن قلعہ گجر سنگھ اور پولیس ٹیم نے سی سی ٹی وی فوٹیج اور ہیومن انٹیلی جنس کی مدد سے کارروائی کرتے ہوئے ملزم کو گرفتار کرلیا اور بچے کو والدین کے حوالے کردیا۔
ایس پی خالد سعید کا کہنا ہے کہ ملزم پولیس کی حراست میں ہے اور اس کے خلاف مضبوط چالان تیار کرکے قرار واقعی سزا دلوائی جائے گی۔ ایس ایس پی انویسٹی گیشن محمد نوید نے پولیس ٹیم کے لیے تعریفی اسناد دینے کا اعلان کیا۔
