پشاور: اینٹی نارکوٹکس فورس (اے این ایف) نے خیبر پختونخوا میں منشیات کے بین الصوبائی نیٹ ورک کے خلاف بڑی کارروائی کرتے ہوئے بھاری مقدار میں چرس برآمد کرلی۔
ترجمان اے این ایف کے مطابق خیبر پختونخوا ریجنل ڈائریکٹوریٹ کو مصدقہ اطلاع ملی تھی کہ ڈسٹرکٹ خیبر کی ایک ڈمپنگ سائٹ پر پتھریلی چٹانوں میں منشیات کی بھاری کھیپ چھپائی گئی ہے۔
اطلاعات کے مطابق یہ منشیات باڑہ کے بدنام زمانہ ڈی ٹی او گروہ کی تھیں، جو آفریدی قبیلے کے معروف اسمگلروں پر مشتمل ہے۔ بتایا گیا ہے کہ ملزمان رات کی تاریکی میں یہ منشیات پنجاب منتقل کرنے کی کوشش کر رہے تھے۔
اے این ایف ٹیم نے بروقت کارروائی کرتے ہوئے مقام پر چھاپہ مارا اور 144 کلوگرام چرس برآمد کرلی۔ ترجمان کے مطابق ملزمان کے خلاف انسدادِ منشیات ایکٹ 1997 کے تحت مقدمہ درج کرلیا گیا ہے، جب کہ مفرور عناصر کی گرفتاری کے لیے مزید تحقیقات جاری ہیں۔
