کراچی: موچکو کے علاقے باکس بے مشرف کالونی میں نامعلوم مسلح ملزمان نے فائرنگ کرکے ٹرک اڈے کے منیجر کو قتل کردیا۔
پولیس کے مطابق واقعہ منگل کی صبح 500 کوارٹر سیکٹر 6-ڈی کنٹینر یارڈ کے قریب پیش آیا، جہاں موٹر سائیکل پر سوار شخص پر نامعلوم حملہ آوروں نے فائرنگ کی اور موقع سے فرار ہوگئے۔
جاں بحق شخص کی شناخت 45 سالہ فاروق خان ولد محمد امیر خان کے نام سے ہوئی، جو مشرف کالونی کا رہائشی اور ٹرک اڈے کا منیجر تھا، جبکہ اس کا آبائی تعلق میانوالی سے بتایا گیا ہے۔ لاش کو ضابطے کی کارروائی کے لیے سول اسپتال کے ٹراما سینٹر منتقل کردیا گیا۔
ایس ایچ او موچکو فیصل لطیف کے مطابق مقتول کو سینے میں گولی لگی جو جان لیوا ثابت ہوئی۔ واقعہ بظاہر لوٹ مار کا نہیں لگتا کیونکہ مقتول کے پاس اس کا موبائل فون، رقم اور موٹر سائیکل موجود تھی۔
ابتدائی تحقیقات سے شبہ ظاہر کیا جا رہا ہے کہ واقعہ ذاتی دشمنی کا نتیجہ ہو سکتا ہے، کیونکہ مقتول کے ایک رشتہ دار کو ایک سال قبل میانوالی میں قتل کیا گیا تھا۔
پولیس نے جائے وقوعہ سے شواہد اور سی سی ٹی وی فوٹیج حاصل کر لی ہے، جبکہ واقعے کی مختلف پہلوؤں سے تفتیش جاری ہے تاکہ قتل کی اصل وجوہات سامنے لائی جا سکیں۔
