بالی وڈ کے معروف اداکار ابھیشیک بچن اور ان کی اہلیہ ایشوریا رائے بچن نے دہلی ہائی کورٹ میں گوگل اور یوٹیوب کے خلاف قانونی کارروائی کرتے ہوئے چار کروڑ روپے ہرجانے کا مطالبہ کیا ہے۔
یہ مقدمہ یوٹیوب پر موجود متعدد ڈیپ فیک (AI سے بنائی گئی جعلی ویڈیوز) کے خلاف دائر کیا گیا ہے جن میں ایشوریا رائے اور دیگر شخصیات کی شناخت اور آواز کا غلط استعمال کیا گیا۔ جوڑے کا مؤقف ہے کہ ان ویڈیوز نے نہ صرف ان کی ساکھ کو نقصان پہنچایا بلکہ ان کی نجی زندگی اور ذاتی حقوق کی بھی خلاف ورزی کی۔
درخواست میں عدالت سے مطالبہ کیا گیا ہے کہ ایسے مواد کو فوراً ہٹایا جائے اور مستقبل میں اس طرح کی ویڈیوز کے پھیلاؤ اور منافع بخش استعمال پر پابندی لگائی جائے۔
ذرائع کے مطابق، عدالت نے ابتدائی طور پر کچھ لنکس ہٹانے کا حکم جاری کر دیا ہے جبکہ گوگل اور یوٹیوب کو تحریری جواب دینے کے لیے نوٹس بھیج دیا گیا ہے۔
قانونی ماہرین کے مطابق، یہ کیس بھارت میں ڈیجیٹل حقوق اور AI کے غلط استعمال کے حوالے سے ایک اہم مثال بن سکتا ہے کیونکہ حالیہ عرصے میں مشہور شخصیات کے ڈیپ فیک ویڈیوز تیزی سے بڑھتے جا رہے ہیں۔
