دبئی میں منعقد ہونے والے عرب ریڈنگ چیلنج 2025 میں تیونس کی 12 سالہ جڑواں بہنوں بیسان اور بیلسان نے صرف ایک سال میں 600 کتابیں پڑھ کر پہلی پوزیشن حاصل کرلی۔
مقابلہ جیتنے پر دونوں بہنوں کو پانچ لاکھ درہم (تقریباً تین کروڑ بیاسی لاکھ پاکستانی روپے) کا انعام دیا گیا۔
قابلِ ستائش بات یہ ہے کہ دونوں ننھی بہنوں نے اعلان کیا کہ وہ اپنی انعامی رقم کا نصف حصہ فلسطینی عوام کے لیے عطیہ کریں گی۔ اس فیصلے نے پورے عرب دنیا میں ان کے لیے احترام اور تحسین کی لہر دوڑا دی۔
عرب ریڈنگ چیلنج متحدہ عرب امارات کی ایک سالانہ مہم ہے جس کا مقصد عرب نوجوانوں میں مطالعے اور علم کی عادت کو فروغ دینا ہے۔
تیونس کی ان جڑواں بہنوں کی علم دوستی اور انسانیت سے محبت نے دنیا کو یہ پیغام دیا ہے کہ تعلیم اور ہمدردی ہی آنے والی نسلوں کی اصل طاقت ہیں۔
