سینئر اداکارہ ثانیہ سعید نے اداکارہ صائمہ قریشی کے اس بیان پر ردعمل دیا ہے جس میں انہوں نے کہا تھا کہ "عورتوں کی کمائی میں برکت نہیں ہوتی۔”
ایک پوڈکاسٹ میں گفتگو کرتے ہوئے ثانیہ سعید نے مسکراتے ہوئے کہا، "صائمہ قریشی کی اپنی کمائی میں تو خوب برکت ہے، شاید انہیں خود نظر نہیں آتی۔”
انہوں نے مزید کہا، "اگر عورت کی کمائی میں برکت نہیں ہوتی تو پھر مردوں کے پیسے کہاں چلے جاتے ہیں؟ بہت سے مرد اسٹاک ایکسچینج میں لگا کر سب کچھ گنوا دیتے ہیں، تو کیا ان کے پیسوں میں برکت ہے؟”
ثانیہ سعید نے صائمہ قریشی کی تعریف کرتے ہوئے کہا کہ وہ "ایک محنتی اور باوقار خاتون ہیں جنہوں نے اپنا کاروبار کامیابی سے چلایا اور بچوں کی بہترین تربیت کی — یہی تو اصل برکت ہے۔”
اداکارہ نے مزید کہا کہ اگر کسی عورت کو لگتا ہے کہ اس کی کمائی میں برکت نہیں تو "ممکن ہے مسئلہ پیسوں کا نہیں بلکہ ساتھ کا ہو۔”
انہوں نے اس حقیقت کی طرف بھی اشارہ کیا کہ "کئی عورتوں کے شوہر ان کی کمائی پر قبضہ کر لیتے ہیں یا ان پر ظلم کرتے ہیں، ایسے میں وہ خواتین کیسے محسوس کریں کہ ان کے پیسوں میں برکت ہے؟”
یاد رہے کہ صائمہ قریشی اس سے قبل کئی انٹرویوز میں یہ بیان دے چکی ہیں کہ "عورتوں کی کمائی میں برکت نہیں ہوتی،” جس پر متعدد سینئر اداکاراؤں نے ان پر تنقید کی تھی۔ بعدازاں صائمہ قریشی نے وضاحت بھی پیش کی تھی۔
