راولپنڈی : راولپنڈی کے علاقے صدر بیرونی میں پولیس مقابلے کے دوران بین الاضلاعی ڈکیت اور اجرتی قاتل گینگ کے چار انتہائی خطرناک ملزمان ہلاک جبکہ دو فرار ہو گئے۔
پولیس کے مطابق کار سنیچنگ کی اطلاع پر مشکوک گاڑیوں کو روکنے کی کوشش کی گئی تو ملزمان نے پولیس پارٹی پر فائرنگ شروع کر دی۔ پولیس کی جوابی کارروائی میں چار ڈاکو موقع پر ہلاک ہو گئے جبکہ دو اندھیرے کا فائدہ اٹھاتے ہوئے فرار ہونے میں کامیاب ہو گئے۔
مقابلے کے بعد پولیس نے کچھ دیر قبل شہری سے گن پوائنٹ پر چھینی گئی گاڑی اور اسلحہ برآمد کر لیا۔ جبکہ گینگ کے زیر استعمال ایک اور گاڑی بھی اسلام آباد سے اسلحہ کے زور پر چھینی گئی تھی۔
پولیس حکام کے مطابق یہی گینگ چند روز قبل صدر بیرونی کے علاقے میں فیملی کے ہمراہ سفر کرنے والے تاجر کے قتل میں بھی ملوث تھا۔ ہلاک ملزمان راولپنڈی، اسلام آباد اور پشاور میں قتل، ڈکیتی اور کار سنیچنگ کے متعدد مقدمات میں ریکارڈ یافتہ اور مطلوب تھے۔
واقعے کی اطلاع ملتے ہی سینئر پولیس افسران موقع پر پہنچ گئے جبکہ فرار ملزمان کی گرفتاری کے لیے سرچ آپریشن جاری ہے۔
سی پی او راولپنڈی سید خالد ہمدانی کا کہنا ہے کہ شہریوں کی جان و مال کو نقصان پہنچانے والے عناصر قانون سے نہیں بچ سکتے۔
