شکارپور: شکارپور کے علاقے جاگن لنک روڈ پر ڈکیتی کی اطلاع پر پہنچی اسٹورٹ گنج پولیس اور ڈاکوؤں کے درمیان فائرنگ کے تبادلے میں ایک ڈاکو ہلاک ہوگیا جبکہ اس کے پانچ ساتھی فرار ہونے میں کامیاب ہوگئے۔
ایس ایس پی شکارپور شاہزیب چاچڑ کے مطابق پولیس نے بروقت کارروائی کرتے ہوئے ڈکیتی کی کوشش ناکام بنا دی۔
پولیس کے مطابق ہلاک ملزم کی شناخت نادر مہر سکنہ رستم کے نام سے ہوئی ہے جو اقدامِ قتل، ڈکیتی، پولیس مقابلوں اور دیگر سنگین مقدمات سمیت 11 کیسز میں مطلوب تھا۔
اہلکاروں کا کہنا ہے کہ ڈاکو دو موٹر سائیکلوں پر اپنے ساتھیوں گلاب سعد خانانی، واجد سومرو اور دیگر ملزمان کے ساتھ واردات کی نیت سے گھات لگائے بیٹھے تھے۔
پولیس پارٹی کو دیکھتے ہی ملزمان نے اندھا دھند فائرنگ شروع کردی، جس پر پولیس نے بھی جوابی کارروائی کی۔ فائرنگ کے نتیجے میں نادر مہر موقع پر ہی ہلاک ہوگیا جبکہ باقی ملزمان فرار ہوگئے۔
موقع سے کلاشنکوف، میگزین اور گولیاں برآمد کرلی گئیں، جبکہ لاش کو پوسٹ مارٹم کے لیے مقامی اسپتال منتقل کردیا گیا ہے۔
ایس ایس پی کے مطابق فرار ڈاکوؤں کی گرفتاری کے لیے سرچ آپریشن جاری ہے اور علاقے میں سیکیورٹی مزید سخت کر دی گئی ہے۔
