راولپنڈی: راولپنڈی میں صدر میٹرو اسٹیشن کے قریب بچی کو گاڑی میں بٹھا کر فرار ہونے والے دو ملزمان کو پولیس نے تحویل میں لے لیا، جبکہ 10 سالہ بچی کو بحفاظت بازیاب کرا لیا گیا۔
پولیس کے مطابق ڈولفن فورس نے مشکوک گاڑی کو روکنے کی کوشش کی تاہم ملزمان نے گاڑی تیز کر دی۔ ڈولفن اہلکاروں نے تعاقب کے دوران قاسم مارکیٹ کے قریب گاڑی کے ٹائر برسٹ کر کے ملزمان کو قابو کر لیا۔
تحویل میں لیے گئے ملزمان کی شناخت محمد ارشد اور محمد احسن کے نام سے ہوئی ہے۔ پولیس نے زیرِ استعمال گاڑی اور بازیاب بچی کو ملزمان سمیت تھانہ سول لائنز منتقل کر دیا ہے۔
پولیس ذرائع کے مطابق بچی کا بیان ہے کہ وہ دونوں افراد کو نہیں جانتی اور اسے صدر میٹرو اسٹیشن کے قریب سے گاڑی میں بٹھایا گیا۔ واقعے کی مزید تفتیش جاری ہے۔
