کراچی: کراچی کے علاقے شاہ لطیف ٹاؤن میں پولیس مقابلے کے دوران ہلاک ہونے والا ملزم انتہائی مطلوب نکلا، جو سنگین جرائم میں ملوث اور متعدد مقدمات میں مفرور تھا۔
پولیس کے مطابق ہلاک ملزم کی شناخت شامیر کے نام سے ہوئی ہے، جو گھروں میں ڈکیتی کی وارداتوں کے دوران خواتین پر تشدد کرنے میں ملوث رہا۔ پولیس ذرائع کا کہنا ہے کہ ملزم کے خلاف قتل، اقدامِ قتل اور ڈکیتی کے متعدد مقدمات درج تھے اور وہ کئی کیسز میں اشتہاری تھا۔
پولیس کا کہنا ہے کہ گزشتہ روز ملزم اپنے ساتھیوں کے ہمراہ علاقے میں لوٹ مار میں مصروف تھا کہ پولیس نے کارروائی کی۔ ملزم نے پولیس کو دیکھتے ہی فائرنگ شروع کر دی، جس پر پولیس کی جوابی فائرنگ سے وہ ہلاک ہوگیا، جبکہ اس کے ساتھی فرار ہونے میں کامیاب ہوگئے۔
پولیس کے مطابق ہلاک ملزم سے برآمد ہونے والا پستول فرانزک تجزیے کے لیے بھیج دیا گیا ہے، جبکہ واقعے کی مزید تحقیقات جاری ہیں۔
