لاہور: لاہور میں گھر سے 17 لاکھ روپے مالیت کا سونا چوری ہونے کے واقعے کا معمہ حل ہو گیا، جس میں واردات کی منصوبہ بندی خود گھر کی بڑی بھابی نے کی تھی۔
پولیس ترجمان کے مطابق تھانہ ویمن ریس کورس نے جدید تفتیشی ذرائع استعمال کرتے ہوئے ملزمہ کو گرفتار کر لیا۔ پولیس کا کہنا ہے کہ ملزمہ نے گھر کے دیگر افراد کی غیر موجودگی میں سونا چوری کیا۔
پولیس کے مطابق ملزمہ نے چوری شدہ سونا فروخت کر کے حاصل ہونے والی رقم اپنی سہیلی کے گھر بطور امانت رکھوائی۔ دورانِ تفتیش ملزمہ نے مالی لالچ کے باعث چوری کی واردات کا ڈرامہ رچانے کا اعتراف کر لیا۔
ایس ایچ او ویمن آمنہ جمیل کے مطابق ملزمہ اسفارا سے 7 لاکھ روپے نقدی اور ایک سونے کی انگوٹھی برآمد کر لی گئی ہے۔ ملزمہ کے خلاف مقدمہ درج کر لیا گیا ہے جبکہ مزید تفتیش جاری ہے۔
ایس پی سول لائنز چوہدری اثر علی کا کہنا ہے کہ شہریوں کے جان و مال کا تحفظ پولیس کی اولین ذمہ داری ہے۔
