کراچی: شہر کے معروف تجارتی مرکز طارق روڈ پر کسٹم حکام کی جانب سے معمار شاپنگ مال میں اسمگل شدہ کپڑوں کی برآمدگی کے لیے کی جانے والی کارروائی کے دوران صورتِ حال کشیدہ ہوگئی۔
پولیس کے مطابق کارروائی کے دوران دکانداروں نے مزاحمت کی اور ہوائی فائرنگ کی، جس سے علاقے میں خوف و ہراس پھیل گیا۔
چھیپا ریسکیو کے مطابق فائرنگ کے تبادلے میں ایک شخص زخمی ہوا جس کی شناخت شارع مسیح کے نام سے ہوئی، زخمی کو طبی امداد کے لیے جناح اسپتال منتقل کردیا گیا۔
کارروائی کے دوران پولیس اور سندھ رینجرز کی بھاری نفری موقع پر موجود رہی جنہوں نے علاقے کو گھیرے میں لے لیا۔
دوسری جانب دکانداروں نے طارق روڈ سگنل کے قریب احتجاج کرتے ہوئے آگ لگا دی اور سڑک کو ٹریفک کے لیے بند کردیا۔
پولیس کا کہنا ہے کہ کارروائی اسمگل شدہ کپڑوں کی برآمدگی کے لیے کی گئی، جبکہ صورتِ حال پر قابو پانے کے لیے اضافی نفری طلب کرلی گئی ہے۔
