معروف پاکستانی فلم ساز نبیل قریشی نے حال ہی میں اپنے قریبی دوست، اداکار اور میزبان فہد مصطفیٰ پر ہلکے پھلکے انداز میں طنزیہ جملہ کسا، جب اداکار ببرک شاہ کا ایک ویڈیو کلپ سوشل میڈیا پر وائرل ہوا۔
ٹی وی شو میں گفتگو کرتے ہوئے ببرک شاہ نے کئی اداکاروں پر کھل کر رائے دی۔ انہوں نے فواد خان کو "اوور ریٹڈ” جبکہ عمران عباس کو فلموں کے لیے غیر موزوں قرار دیا۔ فہد مصطفیٰ کے بارے میں ببرک شاہ نے صرف 10 میں سے 5 نمبر دیے اور کہا کہ وہ فلمی ہیرو کے بجائے ٹی وی میزبان کے طور پر زیادہ بہتر ہیں۔
ببرک شاہ کے مطابق، فہد مصطفیٰ بطور ہوسٹ لیجنڈری طارق عزیز کی صف میں آتے ہیں لیکن اداکاری ان کے بس کی بات نہیں۔
ان بیانات کے بعد یہ کلپ سوشل میڈیا پر تیزی سے پھیل گیا اور شائقین کے درمیان بحث چھڑ گئی۔ اسی دوران نبیل قریشی نے انسٹاگرام پر فہد مصطفیٰ کو مینشن کرتے ہوئے مزاحیہ انداز میں لکھا: "تو بھائی! اداکاری کب سیکھو گے؟”
یہ جملہ دیکھتے ہی دیکھتے وائرل ہوگیا اور صارفین نے کمنٹس میں دلچسپ اور مزاحیہ تبصرے کیے۔
اگرچہ ببرک شاہ کی تنقید نے بحث چھیڑ دی، لیکن نبیل قریشی اور فہد مصطفیٰ کے درمیان یہ ہنسی مذاق اس بات کی جھلک ہے کہ پاکستان کی شوبز انڈسٹری میں رنجشوں کے ساتھ ساتھ دوستانہ چٹکلے بھی چلتے رہتے ہیں.
