فیصل آباد – تھانہ سول لائن کے علاقے میں 13 سالہ کمسن گھریلو ملازمہ پر تشدد کا افسوسناک واقعہ پیش آیا، جہاں گھر کے مالک حبیب سلیم اور ان کی اہلیہ صدف نے مبینہ طور پر بچی کو وحشیانہ تشدد کا نشانہ بنایا۔
پولیس کے مطابق سفاک ملزمان نے بچی کے جسم کو گرم چمٹے سے جلایا اور اس کے بال کاٹ دیے۔ تھانہ سول لائن پولیس نے واقعے کا مقدمہ درج کرکے دونوں ملزمان کو گرفتار کرلیا۔
چائلڈ پروٹیکشن بیورو پنجاب کی چیئرپرسن سارہ احمد نے واقعے کا نوٹس لیتے ہوئے فیصل آباد کی ٹیم کو متاثرہ بچی اور اہل خانہ سے فوری رابطے کی ہدایت جاری کی۔
سارہ احمد نے اپنے بیان میں کہا کہ کمسن گھریلو ملازمہ پر تشدد کا واقعہ انتہائی افسوسناک اور ناقابلِ برداشت ہے۔ انہوں نے یقین دہانی کرائی کہ متاثرہ بچی کو مکمل معاونت فراہم کی جائے گی اور ذمہ داران کے خلاف سخت قانونی کارروائی کی جائے گی۔
