بالی ووڈ کے سینئر اداکار اور شاہد کپور کے والد پنکج کپور نے ایک پوڈکاسٹ انٹرویو میں انکشاف کیا ہے کہ ان کا خاندان تقسیمِ ہند سے قبل پاکستان کے شہر حافظ آباد میں رہائش پذیر تھا۔
انھوں نے بتایا کہ "ہمارا خاندان حافظ آباد میں رہتا تھا، میرے دادا سرکاری ملازم تھے، اس لیے ان کے تبادلے مختلف شہروں میں ہوتے رہتے تھے۔”
پنکج کپور نے مزید کہا کہ تبادلوں کے باوجود ہمارا خاندانی گھرانہ حافظ آباد ہی میں تھا جہاں کپور فیملی ایک مشترکہ خاندان کی صورت میں رہتی تھی۔
اداکار نے بتایا کہ ان کے والد نے لاہور کے ایف سی کالج (Forman Christian College) سے تعلیم حاصل کی، وہ نہ صرف ایک شاندار طالب علم تھے بلکہ معروف مصنف، مقرر اور میگزین ایڈیٹر بھی رہے۔
پنکج کپور کے مطابق، "میرے والد لاہور میں طالب علمی کے زمانے میں اپنے انداز اور شخصیت کے باعث اُس دور کے سب سے بااثر اور اسٹائلش افراد میں شمار ہوتے تھے۔”
انھوں نے مزید بتایا کہ ہمارا خاندان تقسیمِ ہند سے کچھ عرصہ قبل ہی بھارت منتقل ہوگیا تھا، تاہم "جب تک ہم حافظ آباد میں رہے، ہمیں کسی قسم کی تکلیف یا امتیاز کا سامنا نہیں ہوا۔”
