پاکستانی سنیما کے شائقین کے لیے خوشخبری! سپر اسٹار جوڑی ماہرہ خان اور فواد خان کی طویل عرصے سے منتظر فلم ’نیلوفر‘ کی ریلیز کی تاریخ کا باضابطہ اعلان کردیا گیا ہے۔ یہ فلم 28 نومبر 2025 کو دنیا بھر کے سنیما گھروں میں ریلیز کی جائے گی۔
یہ فلم ماہرہ اور فواد کو ایک بار پھر بڑی اسکرین پر اکٹھا دکھائے گی — وہی جوڑی جس نے ہم سفر اور دی لیجنڈ آف مولا جٹ میں اپنی کیمسٹری سے مداحوں کے دل جیت لیے تھے۔ فلم کی کاسٹ میں مدیحہ امام، بہروز سبزواری، عتیقہ اوڈھو، سمیعہ ممتاز، نوید شہزاد، فیصل قریشی اور گوہر رشید جیسے معروف فنکار بھی شامل ہیں۔
’نیلوفر‘ میں ماہرہ خان ایک یادگار اور جذباتی کردار ادا کر رہی ہیں، جب کہ فواد خان ایک پروفیسر کے روپ میں نظر آئیں گے۔ فواد خان نہ صرف فلم کے مرکزی اداکار ہیں بلکہ پروڈیوسر کے فرائض بھی انجام دے رہے ہیں۔
یہ فلم ان شائقین کے لیے ایک خاص تحفہ ثابت ہوگی جو طویل عرصے سے اس مقبول جوڑی کو ایک ساتھ بڑے پردے پر دیکھنے کے منتظر تھے۔ عالمی سطح پر ریلیز کے بعد توقع ہے کہ پاکستانی سنیما کی مقبولیت میں مزید اضافہ ہوگا۔
