پاکستانی ماڈل اور اُبھرتی ہوئی ٹی وی اداکارہ آمنہ یوسف نے منگل کے روز اپنی منگنی یعنی بات پکی کی تقریب کی دلکش تصاویر شیئر کیں، جنہوں نے دیکھتے ہی دیکھتے سوشل میڈیا پر دھوم مچا دی۔
آمنہ نے انسٹاگرام پر جو تصاویر جاری کیں، ان میں وہ روایتی لباس میں نہایت خوبصورت انداز میں اپنے منگیتر کے ساتھ موجود ہیں۔ تصاویر سامنے آتے ہی مداحوں نے مبارکبادوں، نیک تمناؤں اور محبت بھرے پیغامات کی بھرمار کر دی۔
آمنہ یوسف نے مقبول ڈرامہ سیریل فیری ٹیل سے اداکاری کا آغاز کیا تھا، جہاں انہوں نے سحر خان اور حمزہ سہیل کے ساتھ کام کیا۔ ڈرامے میں ان کی سادہ مگر متاثر کن اداکاری نے انہیں کم وقت میں پہچان دلائی اور انہیں شوبز انڈسٹری میں ایک اُبھرتا ہوا چہرہ بنا دیا۔
اس کے بعد آمنہ نے مختلف ماڈلنگ پروجیکٹس، فوٹو شُوٹس اور ڈراموں کے ذریعے اپنی فین فالوونگ میں مزید اضافہ کیا۔ منگنی کی خبر سامنے آنے کے بعد مداح ایک بار پھر ان کی ذاتی زندگی کے اس اہم موقع کو خوشی سے منا رہے ہیں۔
اگرچہ آمنہ نے منگنی کی تقریب کی جھلکیاں تو شیئر کی ہیں، لیکن شادی کی تاریخ یا دیگر تفصیلات تاحال سامنے نہیں آئیں۔
اداکارہ کے مداح ان کی منگنی کی تصاویر کا سلسلہ جاری رہنے کا بے صبری سے انتظار کر رہے ہیں.
