نیٹ فلکس کی مقبول سائنس فکشن اور ہارر سیریز اسٹرینجر تھنگز کے مداحوں کا انتظار بالآخر ختم ہوگیا۔ اسٹریمنگ پلیٹ فارم نے سیریز کے طویل عرصے سے منتظر پانچویں اور آخری سیزن کا پہلا آفیشل ٹریلر جاری کردیا ہے، جو تجسس، جذبات اور خوف سے بھرپور نظر آ رہا ہے۔
جاری کیے گئے ٹریلر میں دکھایا گیا ہے کہ ہاکنز کا شہر ایک بار پھر تباہی کے دہانے پر ہے، تاہم اس بار خطرہ صرف اسی شہر تک محدود نہیں بلکہ پوری دنیا پر شیطانی طاقتوں کے سائے منڈلا رہے ہیں۔ بدنام زمانہ ولن ’ویکنا‘ کی واپسی کے ساتھ کہانی پہلے سے زیادہ پراسرار اور خوفناک رخ اختیار کرتی دکھائی دیتی ہے، جبکہ مرکزی کردار "الیون” — جسے ملی بوبی براؤن نبھا رہی ہیں — ایک بار پھر اپنی جان خطرے میں ڈال کر دشمن کا مقابلہ کرتی نظر آتی ہیں۔
نیٹ فلکس نے اعلان کیا ہے کہ آخری سیزن کو دو حصوں میں ریلیز کیا جائے گا تاکہ مداحوں کی دلچسپی اور تجسس برقرار رکھا جا سکے۔
پہلا حصہ 26 نومبر کو ریلیز ہوگا جبکہ دوسرا حصہ کرسمس کے موقع پر پیش کیا جائے گا۔ اس کے ساتھ ہی نیٹ فلکس نے متعدد ممالک میں اس سیزن کی آخری قسط کو سنیما گھروں میں نمائش کے لیے بھی پیش کرنے کا اعلان کیا ہے۔
سسپنس، جذبات اور خوف کے امتزاج کے ساتھ، اسٹرینجر تھنگز اپنی کہانی کو ایک یادگار انجام دینے جا رہا ہے۔
