کراچی: وفاقی اردو یونیورسٹی، عبد الحق کیمپس کے شعبہ ابلاغِ عامہ کے زیرِ اہتمام سالانہ "احفاظ الرحمٰن ایوارڈ برائے جرأتِ اظہار و آزادی صحافت” کی پروقار تقریب کا انعقاد کیا گیا۔ اس موقع پر ممتاز ادیبہ اور کالم نگار زاہدہ حنا کو ان کی نمایاں ادبی اور صحافتی خدمات کے اعتراف میں "لائف ٹائم اچیومنٹ ایوارڈ 2025” سے نوازا گیا۔
تقریب میں پاکستان کے معروف صحافیوں، ہیومن رائٹس کمیشن آف پاکستان کے نمائندوں، ادیبوں اور دانشوروں کی بڑی تعداد نے شرکت کی۔ پروگرام کا آغاز احفاظ الرحمٰن کی ایک نظم پر رقص سے ہوا، جسے فنکارہ سنوبر نظیر نے دلکش انداز میں پیش کیا۔
ڈاکٹر جعفر نے شین فاروق کا احفاظ الرحمٰن پر لکھا گیا مضمون پیش کیا، جس کے بعد احفاظ الرحمٰن کی ابتدائی اور صحافتی زندگی کی جھلکیاں پیش کی گئیں۔ مقررین نے ایوب خان کے دور میں صحافت پر عائد پابندیوں اور احفاظ الرحمٰن کی اس دور میں دی جانے والی قربانیوں کو خراجِ تحسین پیش کیا۔
کلیدی خطاب ڈاکٹر ریاض شیخ نے پیش کیا، جنہوں نے اظہارِ رائے پر پابندیوں کی تاریخی تسلسل کو موجودہ دور کے تناظر میں بیان کرتے ہوئے لیبرل ازم، نیو لیبرل ازم، اور ڈونلڈ ٹرمپ کے عالمی اثرات کا تجزیہ کیا۔ ان کا کہنا تھا کہ ماضی میں صحافت مشکل ضرور تھی، مگر آج کے جمہوری دور میں حالات مزید پیچیدہ ہو چکے ہیں۔
تقریب میں سنوبر نظیر نے دریائے سندھ سے متعلق سات کنال تنازعے پر بھی رقص پیش کیا، جب کہ نظیر محمود نے احفاظ الرحمٰن کی کتاب "سب سے بڑی جنگ” کا حوالہ دیتے ہوئے حاضرین کو اس کے مطالعے کی تلقین کی۔
زاہدہ حنا کو ایوارڈ پیش کرنے والوں میں ایچ آر سی پی کے اسد اقبال بٹ، معروف صحافی مظہر عباس، اور دیگر اہم شخصیات شامل تھیں۔ میناز رحمٰن نے زاہدہ حنا کی بہادری کو سراہتے ہوئے کہا کہ "وہ اپنی جوانی میں خود گاڑی چلاتی تھیں”، جب کہ ان کی بیٹی نے بتایا کہ "امی خود گاڑی کا ٹائر بھی تبدیل کر لیتی تھیں۔”
شعبہ ابلاغ عامہ کی سربراہ مسرور خانم نے تمام مہمانوں کا شکریہ ادا کرتے ہوئے شعبے کی تاریخ اور اس کے فارغ التحصیل طلبہ کو یاد کیا۔ انہوں نے بتایا کہ احفاظ الرحمٰن بھی اسی شعبے کے طالبعلم تھے۔
تقریب کے اختتام پر شعبہ ابلاغ عامہ کے نمایاں طلبہ کو ایوارڈز اور نقد انعامات سے نوازا گیا، جب کہ ڈاکٹر توصیف احمد نے طلبہ سے حلف بھی لیا۔
