امریکی صدر ڈونلڈ ٹرمپ نے اعلان کیا ہے کہ پاکستان اور امریکہ کے درمیان ایک تاریخی تجارتی معاہدہ طے پا گیا ہے جس کے تحت دونوں ممالک مل کر پاکستان کے تیل کے ذخائر کی تلاش اور ترقی کے لیے کام کریں گے۔
ٹرمپ نے سوشل میڈیا پلیٹ فارم "ٹروتھ سوشل” پر کہا:
"ہم نے پاکستان کے ساتھ ایک ڈیل مکمل کی ہے، اور شاید ایک دن وہ بھارت کو تیل فروخت کر رہے ہوں!”
اس معاہدے کے تحت جلد ہی ایک معروف امریکی آئل کمپنی کو شراکت داری کی قیادت کے لیے منتخب کیا جائے گا۔
بھارت پر 25 فیصد ٹیرف، روس سے تعلقات پر دباؤ
دوسری جانب بھارت، جو ابھی تک امریکہ سے کوئی تجارتی معاہدہ نہیں کر سکا، شدید دباؤ کا سامنا کر رہا ہے۔ امریکہ نے بھارت کی مصنوعات پر 25 فیصد ٹیرف عائد کرنے کا اعلان کیا ہے، جس کی بڑی وجہ بھارت کا روس کے ساتھ تیل اور اسلحے کی تجارت اور غیر مالیاتی تجارتی رکاوٹیں بتائی جا رہی ہیں۔
وائٹ ہاؤس میں گفتگو کرتے ہوئے صدر ٹرمپ نے کہا:
"بھارت دنیا میں سب سے زیادہ ٹیرف لینے والے ممالک میں سے ایک ہے، لیکن وہ اب اسے بہت حد تک کم کرنے پر تیار ہے۔”
یہ اقدام نہ صرف دونوں ممالک کے درمیان جاری مذاکرات کو نقصان پہنچا سکتا ہے بلکہ امریکہ کی چین کے مقابل تزویراتی حکمتِ عملی کو بھی کمزور کر سکتا ہے۔
