11 جون، 2025 لاہور – مشہور ڈرامہ سیریل پرورش کے حالیہ قسط نے ایک غیر معمولی مگر اہم طبی مسئلے پر روشنی ڈالی ہے: بچوں میں گوشت سے الرجی یا عدم برداشت۔
کہانی کی مرکزی کردار "انیہ” ایک معصوم سی بچی ہے جو گوشت کھانے کے بعد اچانک طبیعت خراب ہونے لگتی ہے۔ کبھی قے، کبھی تھکن اور کبھی جسمانی کمزوری کی علامات دیکھ کر گھر والے پہلے پہل اسے معمولی بیماری سمجھتے ہیں۔ تاہم بار بار یہی علامات ظاہر ہونے پر وہ اسے ڈاکٹر کے پاس لے جاتے ہیں۔
ڈرامے میں دکھایا گیا کہ گوشت سے الرجی ایک سنجیدہ طبی مسئلہ ہو سکتا ہے، جسے اکثر والدین یا حتیٰ کہ بعض اوقات معالجین بھی نظر انداز کر دیتے ہیں۔ تشخیص کے عمل میں تاخیر نہ صرف بچے کی صحت کو متاثر کرتی ہے بلکہ والدین کے لیے ذہنی دباؤ کا سبب بھی بنتی ہے۔
ڈاکٹرز کی گفتگو میں اس بات پر زور دیا گیا کہ بچوں میں خوراک کے ردِعمل کو سنجیدگی سے لینا چاہیے، کیونکہ اکثر بچے اپنے احساسات اور تکلیف کو ٹھیک طریقے سے بیان نہیں کر پاتے۔ یہی وجہ ہے کہ والدین کو ان کی غذا پر گہری نظر رکھنی چاہیے۔
ڈرامہ پرورش نے پاکستانی سماج میں موجود ان رویّوں پر بھی روشنی ڈالی ہے، جہاں روایتی کھانوں میں تبدیلی یا پرہیز کو غیر ضروری سمجھا جاتا ہے۔ لیکن یہ کہانی اس سوچ کو چیلنج کرتی ہے اور ناظرین کو باور کرواتی ہے کہ ہر بچہ مختلف ہوتا ہے، اور اس کی صحت اور ضروریات بھی انفرادی توجہ کی مستحق ہیں۔
یہ قسط نہ صرف ایک ماں باپ کے جذباتی سفر کو بیان کرتی ہے بلکہ ناظرین کو بھی سوچنے پر مجبور کرتی ہے کہ شاید ہمارے گھروں میں بھی ایسی کوئی خاموش علامت موجود ہو، جس پر نظرِ ثانی کی ضرورت ہے۔
