کراچی (میڈیا ہائیڈ) — راشد منہاس روڈ پر پیش آنے والے ناخوشگوار واقعے کے بعد صغیر سینٹر کے رہائشیوں میں شدید تشویش پائی جا رہی ہے۔ مقامی مکینوں کا کہنا ہے کہ پولیس نے واقعے میں ملوث نہ ہونے والے بے گناہ افراد کو بھی گرفتار کیا، جس سے علاقے میں خوف و ہراس کی فضا قائم ہو گئی ہے۔
یوسی تھری کے چیئرمین آفاق احمد نے مکینوں کے حقوق کے لیے آواز بلند کرتے ہوئے متعلقہ حکام کو اپنی شکایات پیش کی ہیں۔ انہوں نے واضح کیا کہ بے گناہ افراد کی رہائی اور انصاف کی فراہمی تک جدوجہد جاری رہے گی۔
ادھر آئی جی کراچی جاوید عالم اوڈھو نے اس واقعے پر ایکشن لیتے ہوئے ایس ایچ او یوسف پلازہ انسپکٹر افتخار خانزادہ اور ایس ایچ او فیڈرل بی انڈسٹریل ایریا سب انسپکٹر شاہد آدم بلوچ کو معطل کر کے پولیس ہیڈکوارٹرز گارڈن میں رپورٹ کرنے کا حکم دے دیا ہے۔ معطلی کا یہ فیصلہ فوری طور پر نافذ العمل ہے اور دونوں افسران کے خلاف انکوائری جاری ہے۔
