کراچی، 27 اگست 2025 — کراچی کی رضویہ کالونی میں بدھ کی صبح پیش آنے والے افسوسناک واقعے میں مسلح ڈاکوؤں نے شہریوں کو لوٹنے کے بعد تشدد کا نشانہ بنایا اور ایک نوجوان کو سڑک پر مرغا بنا کر ذلیل کیا۔
واقعے کی سی سی ٹی وی فوٹیج کے مطابق، کار میں سوار چار ملزمان تقریباً 15 منٹ تک شہریوں سے لوٹ مار کرتے رہے۔ ڈاکوؤں نے موٹر سائیکل سوار دو نوجوانوں کو روکا، جن میں سے ایک فرار ہو گیا جبکہ دوسرے سے موبائل فون، نقدی اور موٹر سائیکل چھین لی گئی۔ بعد ازاں اسے تشدد کا نشانہ بنایا گیا اور سڑک پر مرغا بنایا گیا۔
عینی شاہدین کے مطابق، ڈاکوؤں نے تین سے چار موٹر سائیکل سواروں کو لوٹا اور تشدد کیا۔ متاثرہ شہری جب شکایت کے لیے تھانہ رضویہ پہنچے تو عملے نے مبینہ طور پر کہا کہ "کل آنا۔”
وزیر داخلہ سندھ ضیاء الحسن لنجار نے واقعے کا نوٹس لیتے ہوئے ایس ایس پی سینٹرل سے تفصیلات طلب کر لی ہیں۔ انہوں نے ہدایت کی ہے کہ تھانہ رضویہ کے ایس ایچ او کے کوائف اور جرائم کے خلاف کارکردگی کی رپورٹ پیش کی جائے۔
