کیماڑی کے علاقے میں واقع ٹاپو کے قریب پیر کے روز ایک گھر سے 45 سالہ خاتون کی گلا کٹی لاش برآمد ہوئی، پولیس نے واقعے کی تصدیق کر دی۔
پولیس کے مطابق واقعہ کراچی کے علاقے کیماڑی ٹاپو میں سبحان اللہ مسجد کے قریب پیش آیا۔ اطلاع ملنے پر پولیس موقع پر پہنچی اور کرائم سین یونٹ کو طلب کر کے شواہد اکٹھے کیے۔ لاش کو قانونی کارروائی کے لیے سول اسپتال کراچی منتقل کر دیا گیا۔
اسپتال میں مقتولہ کی شناخت 45 سالہ فرضیہ زوجہ عبدالمطلب کے نام سے ہوئی۔ پولیس کے مطابق مقتولہ چھ بچوں کی ماں تھی، جن میں چار بیٹے اور دو بیٹیاں شامل ہیں، جبکہ بیٹیوں کی شادی ہو چکی ہے۔
ایس ایچ او جیکسن مٹھل کے مطابق ابتدائی تحقیقات سے ظاہر ہوتا ہے کہ نامعلوم ملزم گھر میں داخل ہوا اور تیز دھار آلے سے خاتون کا گلا کاٹ کر موقع سے فرار ہو گیا۔ واقعے کے وقت خاتون گھر میں اکیلی موجود تھی۔
پولیس کے مطابق مقتولہ کا شوہر روزگار کے سلسلے میں سعودی عرب میں مقیم ہے۔ خاتون اپنے ساس، سسر اور چار بیٹوں کے ہمراہ رہائش پذیر تھی۔ واردات کے وقت دو بیٹے اسکول جبکہ دو مدرسے میں موجود تھے، جبکہ ساس اور سسر بھی گھر پر نہیں تھے۔
پولیس نے علاقہ مکینوں اور اہل خانہ کے بیانات قلمبند کرنا شروع کر دیے ہیں اور جائے وقوعہ سے حاصل ہونے والے شواہد کی روشنی میں مزید تحقیقات جاری ہیں۔
