کراچی کے مختلف علاقوں میں پیش آنے والے ٹریفک حادثات میں کمسن بچے اور خاتون سمیت دو افراد جاں بحق ہو گئے۔
پولیس کے مطابق کورنگی صنعتی ایریا تھانے کی حدود مہران ٹاؤن سیکٹر بی-6 میں چھپڑا ہوٹل کے قریب مزدا ٹرک کی ٹکر سے چھ سالہ بچہ جاں بحق ہو گیا، جس کی لاش قانونی کارروائی کے لیے جناح اسپتال منتقل کی گئی۔
جاں بحق بچے کی شناخت ذیشان ولد جنسار احمد سولنگی کے نام سے کی گئی۔ پولیس نے بتایا کہ حادثے کے بعد مزدا ٹرک کا ڈرائیور جاوید موقع سے فرار ہو گیا۔ بتایا گیا ہے کہ ڈرائیور گاڑی گھر سے نکال رہا تھا کہ پڑوسی کا بچہ ٹرک کے نیچے آ گیا۔
پولیس نے ٹرک کو تحویل میں لے کر ڈرائیور کے بھائی کو حراست میں لے لیا ہے جبکہ فرار ڈرائیور کی گرفتاری کے لیے کوششیں جاری ہیں۔ متوفی بچہ پانچ بہن بھائیوں میں تیسرے نمبر پر تھا اور اس کے والد فیکٹری میں ملازمت کرتے ہیں۔
دوسری جانب گلستانِ جوہر کے علاقے منور چورنگی کے قریب نامعلوم گاڑی کی ٹکر سے 45 سالہ خاتون جاں بحق ہو گئیں۔ متوفیہ کی شناخت نذیراں بی بی زوجہ محمد حسین کے نام سے کی گئی۔ لاش کو بھی قانونی کارروائی کے لیے جناح اسپتال منتقل کر دیا گیا۔
