کراچی: سپر ہائی وے سچل موڑ کے قریب ڈکیتی کی واردات کے دوران مزاحمت پر فائرنگ سے 12 سالہ بچہ جاں بحق جبکہ اس کا چچا زخمی ہوگیا۔
پولیس کے مطابق واقعہ براق پیٹرول پمپ کے قریب پیش آیا، جہاں دادو کے رہائشی 12 سالہ حسنین ولد محمد قاسم اور اس کے چچا 55 سالہ علی اصغر ولد حاجی بخش سڑک کنارے بیٹھے ہوئے تھے کہ موٹر سائیکل سوار دو مسلح ملزمان ڈکیتی کی نیت سے ان کے قریب آئے۔
چچا نے اپنا اسلحہ نکالا تو ملزمان نے فائرنگ کردی، جس پر علی اصغر نے بھی جوابی فائرنگ کی۔ دونوں جانب سے فائرنگ کے نتیجے میں چچا بھتیجا زخمی ہوگئے جبکہ مسلح ملزمان زخمی حالت میں موقع سے فرار ہوگئے۔
چھیپا رضاکاروں نے زخمیوں کو ڈاؤ اسپتال منتقل کیا، جہاں حسنین زخموں کی تاب نہ لاتے ہوئے دم توڑ گیا۔ پولیس کا کہنا ہے کہ واقعہ ڈکیتی مزاحمت کے دوران پیش آیا اور ملزمان کی گرفتاری کے لیے چھاپے مارے جا رہے ہیں۔
ایس ایس پی ایسٹ ڈاکٹر فرخ رضا کے مطابق ابتدائی تفتیش سے پتہ چلا ہے کہ فائرنگ مزاحمت کے دوران ہوئی۔
دوسری جانب نارتھ کراچی اللہ والی مسجد کے قریب ڈکیتی مزاحمت پر فائرنگ سے 35 سالہ نجم نواز ولد حق نواز زخمی ہوگیا، جسے عباسی شہید اسپتال منتقل کردیا گیا۔
رواں سال اب تک ڈکیتی مزاحمت کے دوران جاں بحق ہونے والے شہریوں کی تعداد 76 ہوچکی ہے۔
