کراچی: ایس آئی یو پولیس کی حراست میں نوجوان کی ہلاکت کے کیس میں اہم پیشرفت ہوئی ہے، واقعے کی تفتیش ایف آئی اے کے سپرد کرنے کا فیصلہ کر لیا گیا۔
ایس ایس پی اے وی ایل سی امجد شیخ، جو ایس آئی یو کا اضافی چارج سنبھالے ہوئے ہیں، کے مطابق کیس کی تفتیش ساؤتھ پولیس سے ایف آئی اے منتقل کی جارہی ہے تاکہ تحقیقات منصفانہ اور شفاف طریقے سے مکمل کی جاسکیں۔ ان کا کہنا تھا کہ ملزم سمیت کیس کا مکمل ریکارڈ پیر کے روز ایف آئی اے کے حوالے کر دیا جائے گا، جس کے بعد ایف آئی اے باضابطہ طور پر تفتیش شروع کرے گی۔
واضح رہے کہ عرفان نامی نوجوان کو بدھ کے روز حراست میں لیا گیا تھا جبکہ جمعرات کی شام اہل خانہ کو اس کی ہلاکت کی اطلاع دی گئی۔ واقعے پر ورثا نے مقدمے اور تفتیش کے طریقۂ کار پر تحفظات کا اظہار کرتے ہوئے انصاف کا مطالبہ کیا۔
گزشتہ روز لواحقین نے سہراب گوٹھ کے قریب احتجاجی مظاہرہ کرتے ہوئے دونوں ٹریک بند کر دیے اور مطالبہ کیا کہ عرفان کی ہلاکت کا مقدمہ ورثا کی مدعیت میں قتل، اغوا اور دہشت گردی کی دفعات کے تحت درج کیا جائے۔
ایس ایچ او ایس آئی یو نے اپنی مدعیت میں صدر تھانے میں واقعے میں غفلت برتنے پر آئی او سمیت دیگر اہلکاروں کے خلاف قتلِ خطا کا مقدمہ درج کروا دیا ہے۔ پولیس کے مطابق ایک اے ایس آئی اور کانسٹیبل کو گرفتار کیا جا چکا ہے، جبکہ دیگر نامزد ملزمان کے خلاف کارروائی جاری ہے۔
