رحیم یار خان: 24 سالہ عائشہ نامی لڑکی، جو مبینہ طور پر زیادتی کا شکار بنی، پولیس کی جانب سے بااثر ملزمان کے خلاف مقدمہ درج نہ کرنے کے خلاف احتجاج کرتے ہوئے 100 فٹ اونچی پانی کی ٹینکی پر چڑھ گئی۔
جیو نیوز کے مطابق متاثرہ لڑکی نے خودکشی کی دھمکی دی، تاہم پولیس اور اہل خانہ کی جانب سے مقدمہ درج کرنے کی یقین دہانی کے بعد اسے ٹینکی سے اتار کر تھانے منتقل کیا گیا۔
گلشن اقبال کی رہائشی عائشہ نے الزام لگایا کہ ایک بااثر شخص نے اسے دو ماہ تک اسلحے کے زور پر زیادتی کا نشانہ بنایا اور نازیبا ویڈیوز بنا کر بلیک میل کرتا رہا۔
متاثرہ لڑکی کے مطابق ملزم نے اسے نشہ آور گولیاں دے کر برہنہ ویڈیوز بنائیں اور وہ ویڈیوز اس کے عزیز و اقارب کو بھی دکھاتا رہا، ساتھ ہی سنگین نتائج کی دھمکیاں بھی دیتا رہا۔
عائشہ کا کہنا تھا کہ اعلیٰ افسران اور عدالت کی جانب سے مقدمہ درج کرنے کے احکامات ملنے کے باوجود مقامی پولیس بااثر ملزمان کے خلاف کارروائی نہیں کر رہی تھی، جس کے باعث وہ مایوسی میں خودکشی پر مجبور ہو گئی۔
