لاہور: صوبائی دارالحکومت میں پیش آنے والے ایک افسوسناک واقعے میں سندر کے علاقے میں دو سگی بہنوں کو مبینہ طور پر اجتماعی زیادتی کا نشانہ بنایا گیا۔
پولیس کے مطابق متاثرہ لڑکیوں کی والدہ کی درخواست پر مقدمہ درج کر لیا گیا ہے، جس میں پانچ افراد قاسم، عمیر جٹ، علی اکبر وٹو، ضیاء الرحمن اور احمد رضا کو نامزد کیا گیا ہے۔
مقدمہ درج ہونے کے بعد پولیس نے چار ملزمان کو گرفتار کر لیا ہے جبکہ ایک ملزم کی گرفتاری کے لیے چھاپے مارے جا رہے ہیں۔ پولیس حکام کا کہنا ہے کہ زیرِ حراست افراد سے تفتیش جاری ہے تاکہ واقعے کی مکمل تفصیلات سامنے لائی جا سکیں۔
متاثرہ لڑکیوں کو طبی معائنے کے لیے اسپتال منتقل کر دیا گیا ہے۔ پولیس کے مطابق میڈیکل رپورٹ موصول ہونے کے بعد مزید قانونی کارروائی عمل میں لائی جائے گی۔
پولیس حکام نے یقین دہانی کرائی ہے کہ خواتین کے خلاف جرائم میں ملوث عناصر کے خلاف سخت اور بلاامتیاز کارروائی کی جائے گی۔
