کراچی — گلشن اقبال کے گبول پارک کے قریب فائرنگ کے ایک شدید واقعے میں ایک موٹر سائیکل سوار ہلاک ہوگیا، جب کہ عینی شاہدین کے مطابق فائرنگ شہری اور مبینہ ڈاکوؤں کے درمیان تبادلے کے دوران ہوئی۔
پولیس نے جائے وقوعہ سے نائن ایم ایم اور 30 بور کے متعدد خول برآمد کیے ہیں۔ حکام کے مطابق ہلاک ہونے والا شخص مبینہ طور پر ڈاکوؤں کا ساتھی تھا، جبکہ اس کا ایک ساتھی اس کی موٹر سائیکل چھین کر موقع سے فرار ہوگیا۔
سر میں گولی لگنے سے جاں بحق ہونے والے شخص کو پہلے قریبی نجی اسپتال منتقل کیا گیا، بعدازاں چھیپا کے رضا کاروں نے اسے ضابطے کی کارروائی کے لیے عباسی شہید اسپتال پہنچایا۔
مقتول کی شناخت 25 سالہ عبدالمقسط کے نام سے ہوئی جو پی آئی بی کالونی کا رہائشی اور سولر پینلز کا کام کرتا تھا۔ پولیس نے بتایا کہ اس کے والدین حیدرآباد میں موجود تھے، جنہیں اطلاع دے دی گئی ہے اور وہ کراچی روانہ ہو چکے ہیں۔
ایک عینی شاہد نے بتایا کہ وہ اسپتال کے قریب موجود تھا جب کار سوار شہری اور ڈاکوؤں میں فائرنگ کا تبادلہ ہوا۔ اس دوران وہ قریبی کھڑی گاڑی کے پیچھے چھپ گیا، جبکہ ڈاکو اس کی موٹر سائیکل لے کر فرار ہوگئے۔
کرائم سین یونٹ نے جائے وقوعہ سے شواہد اکٹھے کرلیے ہیں، جبکہ ابتدائی تحقیقات کے مطابق فائرنگ ڈکیتی کی واردات کے دوران مزاحمت پر ہوئی۔
پولیس کا کہنا ہے کہ واقعے کی ہر پہلو سے تفتیش جاری ہے اور موبائل ڈیوائسز کے ذریعے شواہد مکمل کیے جا رہے ہیں۔
