کراچی میں پہلی بار ایمبولینسوں کے لیے خصوصی لین مختص کر دی گئی ہے تاکہ ایمرجنسی کی صورتحال میں مریضوں کو بروقت اسپتال پہنچایا جا سکے۔ شہرمیں بڑھتی ٹریفک اور رکاوٹوں کے باعث ایمبولینسوں کی روانی متاثر ہوتی رہی ہے، جس کے نتیجے میں کئی قیمتی جانیں خطرے میں پڑ جاتی تھیں۔
شہری انتظامیہ کے مطابق یہ اقدام ریسکیو سروسز کی مسلسل شکایات کے بعد کیا گیا، جنہوں نے ٹریفک جام کو اپنی بڑی رکاوٹ قرار دیا تھا۔ اہم شاہراہوں پر خصوصی لین واضح کی جا رہی ہے جبکہ ٹریفک پولیس کو سختی سے عملدرآمد کرانے کی ہدایت جاری کر دی گئی ہے۔
شہریوں نے اس فیصلے کو خوش آئند قرار دیتے ہوئے کہا ہے کہ یہ دیرینہ مطالبہ تھا جو اب جا کر پورا ہوا ہے۔ ریسکیو اہلکاروں کا کہنا ہے کہ اس اقدام سے ایمرجنسی میں مریضوں کو بروقت اسپتال پہنچانا پہلے سے کہیں آسان ہو جائے گا۔
انتظامیہ کا کہنا ہے کہ اگر منصوبہ کامیاب رہا تو اسے شہر کے مزید علاقوں میں بھی توسیع دی جائے گی۔
