کشمور: سندھ رینجرز اور پولیس نے ضلع کشمور کے تھانہ دُرانی مہر کی حدود میں اغواء برائے تاوان میں ملوث خادم بھیو ڈکیت گینگ کے خلاف مشترکہ آپریشن کیا، جس کے نتیجے میں مغوی پولیس کانسٹیبل صفدر محمد کو بازیاب کرالیا گیا۔
ترجمان رینجرز سندھ کے مطابق 20 ستمبر 2025 کو خادم بھیو گینگ نے پولیس پکٹ قمبرانی لاڑو سے ڈیوٹی پر مامور کانسٹیبل صفدر محمد کو اغواء کیا تھا اور بعدازاں اس کی ویڈیو سوشل میڈیا پر وائرل کردی تھی۔
رینجرز اور پولیس نے مشترکہ حکمتِ عملی کے تحت کارروائی کرتے ہوئے ڈاکوؤں کے ٹھکانے پر چھاپہ مارا۔ آپریشن کے دوران شدید فائرنگ کا تبادلہ ہوا جس میں تین ملزمان صحبت جاگیرانی، شاہد بھیو اور شفیق دھانی ہلاک ہوگئے جبکہ خادم بھیو، واجد بھیو، مالک جاگیرانی سمیت نو افراد زخمی ہوئے۔
ترجمان کے مطابق ہلاک ڈاکو صحبت جاگیرانی کے سر کی قیمت پانچ لاکھ روپے جبکہ خادم بھیو کے سر کی قیمت دس لاکھ روپے مقرر تھی۔ کارروائی کے دوران گینگ کا ٹھکانا بھی مسمار کردیا گیا۔
رینجرز ترجمان نے عوام سے اپیل کی کہ ڈاکوؤں اور ان کے سہولت کاروں کی نشاندہی کریں تاکہ سندھ کو جرائم پیشہ عناصر سے پاک کرنے کی کوششوں کو مزید مؤثر بنایا جاسکے۔ شہری رینجرز ہیلپ لائن 1101 یا واٹس ایپ نمبر 03479001111 پر اطلاع فراہم کرسکتے ہیں، ان کا نام صیغہ راز میں رکھا جائے گا۔
