کوئٹہ کے پولیس ٹریننگ کالج میں زیرِ تربیت دو پولیس اہلکار دل کا دورہ پڑنے کے باعث جاں بحق ہو گئے۔ یہ واقعات 5 اور 7 نومبر کو پیش آئے۔ جاں بحق اہلکاروں کی شناخت ضلع شیرانی سے تعلق رکھنے والے سمیع اللہ اور ضلع ژوب کے رہائشی مرزا خان کے نام سے ہوئی ہے۔ بلوچستان پولیس کے مطابق دونوں اہلکاروں کو طبی امداد فراہم کرنے کے بعد شیخ خلیفہ بن زید اسپتال منتقل کیا گیا، جہاں ڈاکٹرز نے ان کی موت کی تصدیق کی۔
دوسری جانب پولیس ٹریننگ کالج میں زیرِ تربیت پانچ دیگر اہلکاروں کو ہائی بلڈ پریشر کی شکایت کے باعث اسپتال منتقل کیا گیا۔ پولیس حکام کے مطابق طبی معائنے اور علاج کے بعد تمام متاثرہ اہلکاروں کی حالت خطرے سے باہر ہے۔ بلوچستان پولیس کے ترجمان نے کالج میں ناقص خوراک یا فوڈ پوائزننگ کی اطلاعات کو مسترد کرتے ہوئے کہا ہے کہ ایسا کوئی واقعہ پیش نہیں آیا۔
ان واقعات کے بعد پولیس ٹریننگ کالج میں طبی سہولیات، خوراک کے معیار اور تربیتی انتظامات کے حوالے سے سوالات اٹھائے جا رہے ہیں۔ بعض زیرِ تربیت اہلکاروں نے بنیادی سہولیات اور طبی انتظامات پر تحفظات کا اظہار کیا ہے، جبکہ بلوچستان پولیس کا کہنا ہے کہ کالج کی ڈسپنسری فعال ہے اور ایمبولینسز بھی دستیاب ہیں۔ واقعے کی اصل وجوہات جاننے کے لیے غیر جانبدارانہ تحقیقات کا مطالبہ بھی سامنے آیا ہے۔
