اداکارہ کومل میر کے حالیہ بیان نے سوشل میڈیا صارفین کو دو گروپوں میں تقسیم کر دیا ہے، جہاں کچھ نے ان کی دیانتداری کو سراہا تو کئی صارفین نے بے وفائی کو قبول کرنے کی سوچ پر شدید تنقید کی۔
کومل میر، جنہوں نے شوبز میں قدم مس ویٹ پاکستان کے پلیٹ فارم سے رکھا اور بعدازاں کئی مقبول ڈراموں میں اداکاری کے جوہر دکھائے، حال ہی میں ایک ٹی وی شو میں شریک ہوئیں۔ شو کے دوران ان سے پوچھا گیا کہ وہ غریب مگر وفادار مرد کو ترجیح دیں گی یا امیر مگر بے وفا کو؟
اس پر کومل میر نے بلا جھجک جواب دیا، "امیر مگر بے وفا مرد کو ترجیح دوں گی، کیونکہ آج کل وفاداری ویسے بھی نہیں ملتی، تو کم از کم پیسہ تو ہو۔”
ان کے اس بیان کے بعد سوشل میڈیا پر ملا جلا ردعمل دیکھنے کو ملا۔ بعض صارفین نے کہا کہ ہر عورت کو حق حاصل ہے کہ وہ مالی طور پر مستحکم شریکِ حیات کا انتخاب کرے، لیکن وفاداری کی نفی کرنا ایک خطرناک رجحان کو جنم دے سکتا ہے۔
ایک صارف نے لکھا، "یہ کہنا کہ چونکہ کوئی وفادار نہیں اس لیے بے وفا کو قبول کرلینا چاہیے، دراصل اخلاقی اقدار کو معمول پر لانے کے مترادف ہے۔”
دوسری جانب کچھ افراد نے کومل میر کی صاف گوئی کی تعریف بھی کی۔ ایک صارف نے کہا، "کم از کم وہ سچ بول رہی ہیں، باقی تو سب جھوٹے خواب دکھاتے ہیں۔” ایک اور نے طنزیہ انداز میں کہا، "آج کل سب بے وفا ہی ہیں، بہتر ہے بندہ BMW میں روئے نہ کہ سائیکل پر۔”
کومل میر کی جانب سے اس بیان پر تاحال کوئی وضاحت یا ردعمل سامنے نہیں آیا، لیکن یہ موضوع فی الحال سوشل میڈیا پر زیرِ بحث ہے اور صارفین اپنے اپنے انداز میں اس پر اظہارِ خیال کر رہے ہیں۔
