راولپنڈی – انسدادِ منشیات فورس (اے این ایف) نے ملک بھر میں بڑی کارروائیاں کرتے ہوئے 12 کروڑ 36 لاکھ روپے سے زائد مالیت کی منشیات برآمد کرلی۔ کارروائیوں کے دوران ایک افغان شہری اور خاتون سمیت 9 ملزمان کو گرفتار کیا گیا۔
ترجمان اے این ایف کے مطابق تعلیمی اداروں کے اطراف اور مختلف شہروں میں منشیات فروشوں کے خلاف کریک ڈاؤن جاری ہے۔ مختلف کارروائیوں میں مجموعی طور پر 200 کلوگرام سے زائد ہیروئن، آئس اور چرس برآمد کی گئی۔
چناب ٹول پلازہ گجرات کے قریب خاتون کے قبضے سے 4.32 کلوگرام ہیروئن اور 400 گرام آئس برآمد ہوئی، جب کہ اٹک میں یونیورسٹی کے قریب موٹرسائیکل سوار سے 600 گرام چرس ملی۔ گرفتار ملزمان نے اعتراف کیا کہ وہ طلبہ کو منشیات فراہم کرتے تھے۔
جناح ایئرپورٹ کراچی پر ریاض جانے والے مسافر کے سامان سے 13 ہزار زینیکس گولیاں برآمد ہوئیں، جبکہ کراچی کے ایک کوریئر آفس میں برطانیہ بھیجے جانے والے پارسل سے 1.62 کلوگرام ہیروئن ملی۔ لاہور کے کوریئر آفس میں آسٹریلیا بھیجے جانے والے پارسل میں 990 گرام آئس کپڑوں کے ٹکڑوں میں بھگو کر جوتوں میں سی کر چھپائی گئی تھی۔
چکلالہ گیریژن راولپنڈی میں امریکا سے آئے پارسل میں کھلونوں کے اندر سے 14 گرام ویڈ برآمد ہوئی۔ کامرہ روڈ اٹک کے قریب گاڑی سے 2.59 کلوگرام ہیروئن اور 2.1 کلوگرام آئس ملی، جس پر افغان شہری سمیت 2 افراد گرفتار ہوئے۔
ہزارہ ایکسپریس وے تھاکوٹ کے قریب 14.4 کلوگرام چرس اور لک پاس ٹول پلازہ کوئٹہ کے قریب 5 کلوگرام آئس برآمد ہوئی۔ ویسٹرن بائی پاس ہزار گنجی کوئٹہ کے قریب 86 کلوگرام ہیروئن اور 80 کلوگرام چرس بھی برآمد کی گئی۔
تمام مقدمات انسدادِ منشیات ایکٹ 1997 کے تحت درج کرکے مزید تفتیش شروع کر دی گئی ہے۔
