کراچی – کراچی پولیس نے بڑی کارروائی کرتے ہوئے انٹرپول کی مدد سے ماسی گینگ کے سرغنہ عمران ولد عباس علی کو گرفتار کرلیا۔ انٹرپول نے ملزم کو سعودی عرب میں گرفتار کیا تھا اور اتوار کے روز پاکستانی حکام کے حوالے کیا۔
ڈی ایس پی انویسٹی گیشن بن قاسم شاہنواز میمن کے مطابق کراچی پولیس نے ملزم کی گرفتاری کے لیے انٹرپول کو ریڈ وارنٹ جاری کرنے کی درخواست کی تھی، جس پر کارروائی کرتے ہوئے سعودی حکام نے عمران کو گرفتار کیا۔ ملزم کو سعودی قوانین کے تحت 9 ماہ قید کی سزا ہوئی، بعد ازاں انٹرپول نے اسے اسلام آباد میں پاکستانی حکام کے حوالے کیا، جہاں سے اسے بن قاسم پولیس کے حوالے کیا گیا۔
پولیس کے مطابق گرفتار عمران کراچی، لاہور اور اسلام آباد میں ماسیوں کا نیٹ ورک چلاتا تھا۔ خواتین ماسیاں گھروں میں کام حاصل کرکے سونا اور نقدی چوری کرتی تھیں، جبکہ عمران انہیں ٹرانسپورٹ اور دیگر سہولیات فراہم کرتا تھا۔
ڈی ایس پی کے مطابق گینگ کی دو خواتین، جو درخشاں اور اسٹیل ٹاؤن میں چوریوں میں ملوث تھیں، پہلے ہی گرفتار کی جا چکی ہیں۔ ان خواتین نے درخشاں میں سیاسی رہنما سعدیہ جاوید کے گھر سے بھی چوری کی تھی۔
پولیس کے مطابق گرفتار ملزم چوری کے پیسوں سے آزاد ویزا حاصل کرکے سعودی عرب فرار ہوگیا تھا۔ عمران کے خلاف پنجاب کے مختلف شہروں میں بھی متعدد مقدمات درج ہیں اور وہ وہاں کی پولیس کو بھی مطلوب ہے۔ پولیس نے ملزم کو ملیر کورٹ میں پیش کرکے ریمانڈ حاصل کرنے کا فیصلہ کیا ہے۔
