اسلام آباد: نیشنل سائبر کرائم انویسٹی گیشن ایجنسی (NCCIA) نے انٹرنیٹ پر شہریوں کا ذاتی ڈیٹا فروخت کرنے والے ملزم کو گرفتار کرلیا، جبکہ اس کے قبضے سے کروڑوں پاکستانیوں کے ڈیٹا پر مشتمل ہارڈ ڈسک برآمد ہوئی ہے۔
ایکسپریس نیوز کے مطابق وفاقی وزیرِ داخلہ محسن نقوی کی ہدایت پر ڈی جی نیشنل سائبر کرائم انویسٹی گیشن ایجنسی نے خصوصی انکوائری کمیٹی تشکیل دی تھی، جس کی کئی روزہ تحقیقات کے بعد کارروائی عمل میں لائی گئی۔
پولیس کے مطابق گرفتار ملزم کی شناخت انیس احمد شاہ کے نام سے ہوئی ہے جو بھکر کا رہائشی ہے، اس کے خلاف باقاعدہ مقدمہ درج کر لیا گیا ہے۔
ذرائع کا کہنا ہے کہ ملزم کے قبضے سے ایک ٹیرا بائٹ کی ہارڈ ڈسک برآمد ہوئی جس میں لاکھوں شناختی کارڈ نمبرز، پتے اور شہریوں کی ذاتی معلومات موجود تھیں۔ ملزم نے یہ ڈیٹا بلیک مارکیٹ سے خریدا اور دس سے زائد ویب سائٹس کے ذریعے فروخت کر رہا تھا۔
تحقیقات کے مطابق مزید شواہد اکٹھے کیے جا رہے ہیں جبکہ اب بھی انٹرنیٹ پر متعدد ویب سائٹس ایسی سرگرمیوں میں ملوث ہیں۔
واضح رہے کہ ایکسپریس نیوز نے 7 ستمبر کو انکشاف کیا تھا کہ شہریوں کے موبائل نمبرز، شناختی کارڈ نمبرز، پتے اور ٹریول ہسٹری سمیت ذاتی معلومات ویب سائٹس پر فروخت کی جا رہی ہیں، جس پر وفاقی وزیرِ داخلہ محسن نقوی نے نوٹس لیتے ہوئے انکوائری کا حکم دیا تھا۔
