کراچی: شہر قائد میں پولیس مقابلے کے دوران پولیس کی وردی پہن کر ڈکیتیوں میں ملوث چار ملزمان کو زخمی حالت میں گرفتار کر لیا گیا، جبکہ ان کے دو ساتھی فرار ہونے میں کامیاب ہو گئے۔
پولیس حکام کے مطابق ملزمان پولیس چیکنگ کا بہانہ بنا کر گھروں میں داخل ہوتے اور شہریوں سے لوٹ مار کرتے تھے۔ مقابلے کے دوران فائرنگ کے تبادلے میں چار ملزمان زخمی ہو گئے جنہیں گرفتار کر لیا گیا۔
گرفتار ملزمان کی شناخت کامران، حمید، عمران اور رمضان کے ناموں سے ہوئی ہے۔ پولیس نے ملزمان کے قبضے سے پولیس یونیفارمز، اسلحہ، موبائل فونز، نقدی اور موٹر سائیکل برآمد کر لی ہے۔
پولیس کا کہنا ہے کہ گرفتار ملزمان کورنگی کے مختلف علاقوں میں متعدد ڈکیتیوں کی وارداتوں میں ملوث رہے ہیں۔ فرار ہونے والے ملزمان کی گرفتاری کے لیے خصوصی ٹیمیں تشکیل دے دی گئی ہیں، جنہیں جلد گرفتار کر کے قانون کے کٹہرے میں لایا جائے گا۔
