کراچی: مبینہ پونزی اسکیم اور آن لائن فراڈ کیس میں عدالت نے دس ملزمان کی ضمانت کی درخواستیں مسترد کر دیں، جن میں غیر ملکی اور چینی باشندے بھی شامل ہیں۔
یہ فیصلہ جج گلریز میمن نے فریقین کے دلائل سننے کے بعد سنایا۔ عدالت نے قرار دیا کہ الزامات کی نوعیت انتہائی سنگین ہے اور تفتیش تاحال ابتدائی مرحلے میں ہے۔
عدالت کے مطابق تمام ملزمان باہمی ملی بھگت سے سوشل میڈیا کے ذریعے جعلی سرمایہ کاری اسکیمیں چلا رہے تھے، جن میں جعلی اور غیر حقیقی منافع کا لالچ دے کر عوام کو سرمایہ کاری پر آمادہ کیا گیا۔
عدالتی ریمارکس میں کہا گیا کہ ملزمان ایک مکمل طور پر فعال کال سینٹر بھی چلا رہے تھے جبکہ ان کے خلاف شواہد ریکارڈ پر موجود ہیں۔ عدالت نے اس مرحلے پر ضمانت دینا مناسب قرار نہیں دیا۔
واضح رہے کہ ملزمان کی گرفتاری سے متعلق وزیرِ داخلہ ضیاء الحسن لنجار نے بھی ایک پریس کانفرنس کی تھی۔
