لاہور: انسپکٹر جنرل پولیس پنجاب، ڈاکٹر عثمان انور نے کہا ہے کہ پنجاب پولیس سیلاب سے متاثرہ علاقوں میں ریلیف اور بحالی کے کاموں میں بھرپور انداز سے مصروف عمل ہے۔ انہوں نے کہا کہ ممکنہ بارشوں اور سیلابی صورتحال سے نمٹنے کے لیے پولیس کی تیاریاں مکمل ہیں۔
آئی جی پنجاب کے مطابق، پولیس محکمہ پی ڈی ایم اے، ضلعی انتظامیہ، سول ڈیفنس، ریسکیو 1122 اور دیگر سکیورٹی اداروں کے ساتھ مسلسل رابطے میں ہے تاکہ کسی بھی ہنگامی صورتحال میں فوری ردِعمل دیا جا سکے۔
انہوں نے یقین دہانی کرائی کہ پنجاب پولیس شہریوں کی جان و مال کی حفاظت کو ہر صورت یقینی بنائے گی اور سیلاب متاثرین کی ریسکیو، ریلیف اور بحالی کے کاموں میں دیگر اداروں کے شانہ بشانہ کھڑی ہے۔
پنجاب پولیس کے ترجمان کے مطابق، پولیس افسران و اہلکار سیلابی ریلے سے متاثرہ رابطہ سڑکوں کی بحالی، امدادی سرگرمیوں، اور متاثرہ افراد میں خوراک و دیگر ضروری اشیاء کی تقسیم میں سرگرم کردار ادا کر رہے ہیں۔
