اسلام آباد: اسلام آباد کی انسداد دہشت گردی عدالت (اے ٹی سی) نے احتجاجی مظاہرے کے دوران درج ہونے والے مقدمے میں سابق سینیٹر مشتاق احمد خان اور ایک اور ملزم دانیال کو تین روزہ جسمانی ریمانڈ پر پولیس کے حوالے کر دیا۔ ڈیوٹی جج رخسانہ شاہین نے ملزمان کو عدالت میں پیش کرنے کا حکم دیا۔
سماعت کے دوران استغاثہ نے ملزمان کے 30 روزہ جسمانی ریمانڈ کی استدعا کی اور مؤقف اختیار کیا کہ پولیس کو کیس سے منسلک ایک گاڑی اور اسلحہ برآمد کرنا ہے۔ فریقین کے دلائل سننے کے بعد عدالت نے پولیس کی استدعا کو منظور کرتے ہوئے مشتاق احمد اور دیگر ملزمان کا تین روزہ جسمانی ریمانڈ منظور کر لیا اور ریمانڈ کی مدت پوری ہونے پر انہیں دوبارہ عدالت میں پیش کرنے کی ہدایت کی۔
مقدمہ 31 جولائی کو اسلام آباد کے شالیمار پولیس اسٹیشن میں سب انسپکٹر غلام مرتضیٰ کی مدعی میں درج کیا گیا تھا۔ ایف آئی آر کے متن کے مطابق سابق سینیٹر مشتاق احمد نے 400 سے 500 افراد کے ہجوم کی قیادت کرتے ہوئے F-10 میں اجتماع کیا، جہاں مبینہ طور پر لاؤڈ اسپیکر پر اشتعال انگیز تقاریر کیں، دکانیں بند کروائیں اور سرکاری اداروں کے خلاف نعرے بازی کی۔ ایف آئی آر میں مزید الزام لگایا گیا ہے کہ ضلعی انتظامیہ کی جانب سے این او سی نہ ہونے پر اجتماع ختم کرنے کی تنبیہ کے باوجود مظاہرین نے شالیمار پلازہ کے قریب مرکزی شاہراہ کو بلاک کر دیا۔
پولیس کے مطابق مظاہرین نے مبینہ طور پر میڈیا کی ڈی ایس این جی (DSNG) گاڑی اور دیگر نجی گاڑیوں میں توڑ پھوڑ کی، پتھراؤ کیا اور پولیس اہلکاروں پر حملہ کر کے ان کے ہنگامہ آرائی کے خلاف استعمال ہونے والے ہیلمٹ تک چھین لیے۔
واضح رہے کہ اس سے قبل مشتاق احمد کی جماعت ‘پاکستان رائٹس موومنٹ’ نے دعویٰ کیا تھا کہ انہیں 28 جولائی کو کہوٹہ بازار سے اس وقت حراست میں لیا گیا جب وہ آزاد پٹن پل سے آزاد کشمیر میں داخلے کی اجازت نہ ملنے پر واپس آ رہے تھے۔ پولیس حکام کی جانب سے اس وقت باضابطہ تصدیق نہیں کی گئی تھی، تاہم بعد ازاں ان کے سوشل میڈیا اکاؤنٹ سے رہائی کی تصدیق کی گئی، جس کے بعد انہوں نے 31 جولائی کو اسلام آباد کے F-10 میں کشمیریوں سے اظہارِ یکجہتی کے لیے اجتماع کا اعلان کیا تھا۔
