لاہور: پنجاب پولیس نے صوبے بھر بشمول لاہور میں سرچ، سویپ اور کومبنگ آپریشنز کا دائرہ وسیع کرتے ہوئے گزشتہ 24 گھنٹوں کے دوران مجموعی طور پر 515 کومبنگ آپریشنز کیے، جن میں 20 ہزار 340 سے زائد مشتبہ افراد کی جانچ پڑتال کی گئی اور 70 مشکوک افراد کو حراست میں لیا گیا۔
ترجمان پنجاب پولیس کے مطابق، مختلف علاقوں میں 28 سرچ اینڈ سویپ آپریشنز بھی کیے گئے، جن میں 3144 سے زائد افراد سے پوچھ گچھ کی گئی جبکہ 2 مشتبہ افراد کو حراست میں لیا گیا۔
پولیس نے کارروائیوں کے دوران خطرناک جرائم میں ملوث 447 اشتہاری مجرمان، 158 عدالتی مفرور اور 111 عادی مجرمان کو گرفتار کیا۔ اس کے علاوہ جرائم پیشہ افراد سے بڑی تعداد میں ناجائز اسلحہ اور گولیاں بھی برآمد کی گئیں۔
ترجمان کے مطابق، مختلف مقابلوں کے دوران 5 مجرمان ہلاک ہوئے جبکہ 5 کو زخمی حالت میں گرفتار کیا گیا۔
آئی جی پنجاب ڈاکٹر عثمان انور نے کہا ہے کہ ملک دشمن عناصر اور جرائم پیشہ گروہوں کے خلاف کارروائیاں بلا امتیاز جاری رہیں گی، اور سرچ، سویپ اور کومبنگ آپریشنز مزید مؤثر انداز میں جاری رکھے جائیں گے۔
